БЕРЕКЕЛІ ОТЫРАРДЫҢ ДИҚАНДАРЫ МОЛ ӨНІМГЕ ҚОЛ ЖЕТКІЗУДЕ
Елімізде агроөнеркәсіптік кешенді дамыту – экономиканың негізгі басым бағыттарының бірі. Мемлекет тарапынан ауыл шаруашылығы саласына көрсетіліп жатқан жан-жақты қолдаудың нәтижесінде өңірлерде егіншілік мәдениеті жаңарып, заманауи технологиялар кеңінен енгізіліп, еңбек өнімділігі артып келеді. Осындай игі бастамалардың нақты нәтижесі қасиетті Отырар өңірінде де айқын көрініс табуда.
Тарихы терең, топырағы құнарлы Отырар ауданы бүгінде тек мәдени мұрасымен ғана емес, ауыл шаруашылығындағы жоғары жетістіктерімен де көпке үлгі болып келеді. Аудан әкімдігінің бастамасымен ауыл шаруашылығы саласын әртараптандыру, су ресурстарын тиімді пайдалану, заманауи агротехнологияларды енгізу және диқандарды мемлекеттік қолдау бағытында жүйелі жұмыстар жүргізілуде. Соның арқасында жыл сайын ауданның аграрлық әлеуеті артып, өнім көлемі еселеніп келеді.
Биыл да берекелі еңбектің жемісі мол. Отырар ауданының Қарғалы ауылында бидай орағы басталып, диқандар алғашқы күннен-ақ жоғары өнімге қол жеткізуде. Биыл ауыл шаруашылығы тауарын өндірушілер 60 гектар алқапқа бидай егіп, әр гектардан алынатын өнім көлемінің көңіл қуантатынын айтуда. Бұл – жерді дұрыс өңдеу, сапалы тұқым пайдалану және агротехникалық талаптарды сақтаудың нәтижесі.
Ауданда алғашқылардың бірі болып бидай өсіруді қолға алған «Қарабала», «Төлеген» және «Төребек» шаруа қожалықтары төрт жылдан бері тұрақты түрде мол өнім жинап келеді. Еңбекқор шаруалардың тәжірибесі көрсеткендей, жердің бабын таба білген адам әрдайым берекелі өнімге қол жеткізеді. Биылғы маусымда да олар өткен жылдардағы жетістіктерін еселеп, жоғары өнім алуға толық мүмкіндік бар екенін жеткізуде.
Отырарлық диқандардың табысы – кездейсоқ жетістік емес. Бұл – аудан әкімдігі тарапынан көрсетіліп жатқан қолдаудың, мемлекеттік бағдарламалардың тиімді жүзеге асуының және шаруалардың тынымсыз еңбегінің нәтижесі. Аудан басшылығы ауыл шаруашылығы саласын дамытуға ерекше көңіл бөліп, егіс алқаптарын сумен қамтамасыз ету, ауыл шаруашылығы техникаларын жаңарту, су үнемдеу технологияларын енгізу және инфрақұрылымды жақсарту бағытындағы жұмыстарды тұрақты түрде үйлестіріп келеді.
Әсіресе соңғы жылдары Отырар ауданында су ресурстарын тиімді пайдалану мәселесіне ерекше назар аударылып, ирригациялық жүйелерді жетілдіру бағытында маңызды жобалар жүзеге асырылуда. Бұл өз кезегінде егіс көлемін ұлғайтуға және өнім сапасын арттыруға оң ықпалын тигізіп отыр.
Бүгінде Отырар ауданы Түркістан облысындағы ауыл шаруашылығы қарқынды дамып келе жатқан өңірлердің біріне айналды. Мұнда диқандар тек дәстүрлі егіншілікпен шектелмей, жаңа технологияларды меңгеріп, өнім көлемін арттыру арқылы өңір экономикасының дамуына елеулі үлес қосуда.
Берекелі өлкенің еңбекқор шаруаларының табанды еңбегі ауданның әлеуметтік-экономикалық дамуына серпін беріп қана қоймай, еліміздің азық-түлік қауіпсіздігін қамтамасыз етуге де өз үлесін қосып келеді.
Жердің қадірін біліп, маңдай терімен мол өнім өсіріп отырған Отырардың диқандары – адал еңбектің жарқын үлгісі. Осындай еңбек адамдарының арқасында қасиетті Отырардың ауыл шаруашылығы жылдан-жылға өркендеп, ауданның абыройы артып келеді. Алдағы уақытта да аудан әкімдігі мен шаруалардың бірлескен жүйелі жұмысының нәтижесінде Отырардың аграрлық әлеуеті одан әрі нығайып, мол өнім мен берекелі тірлік жалғасын табары сөзсіз.
