Түркістан аудандарының басшылары Сауранда инновациялық өндірістермен танысты

Түркістан облысының Арыс қаласы, Отырар, Сайрам, Сарыағаш, Түлкібас, Төлеби және Бәйдібек аудандарының әкімдері, сондай-ақ кәсіпкерлік, ауыл шаруашылығы, жер қатынастары және тұрғын‑үй-коммуналдық шаруашылық басқармаларының басшылары мен ауылдық округ әкімдері Сауран ауданына арнайы іс‑сапармен келді. Делегацияның басты мақсаты – өңірлік кәсіпкерлікті дамытудың тиімді тәжірибелерімен танысу, индустриалды жобалардың іске асыру барысын көзбен көру, нысандарды аралап, тәжірибе алмасу болды. Алдымен олар Шаға ауылдық округіндегі өндірістік паркке барып, ауылшаруашылыққа арналған тамшылатып суару жүйелері мен тіркемелі техникалар шығаратын «BNK GROUP LTD» ЖШС-нің жұмысымен танысты – бұл кәсіпорын өнімдерін ішкі нарықпен қатар, Өзбекстан, Қырғызстан, Тәжікстан, Ресей және басқа да елдерге экспорттауды жоспарлауда. Өзге бір өндіріс орны – «Aqniet Holding» ЖШС мектеп, кеңсе және медициналық жиһаз шығарады.

Келесі аймақта – Иассы ауылдық округіндегі Еңбекші Дихан елді мекенінде орналасқан 9 гектарлық өндірістік аймақ болды, мұнда жоспар бойынша 24 жоба жүзеге асырылуы тиіс және олардың ішінде клинкер қасбеттік плиткалар өндіретін «AR Group LLP» ЖШС бар. Қарашық ауылындағы 10 гектарлық өндірістік аймақта 20 жоба жоспарланған, бүгінгі таңда 12 кәсіпкер құрылыс жұмыстарын бастап кетті. Сонымен қатар, Жүйнек ауылдық округінде «MinPromKaz» ЖШС құрғақ құрылыс қоспаларын, «Asia Brand» ЖШС корпустық жиһаз, ал «DIVALUX» ЖШС жұмсақ жиһаз өндіру жұмыстарын көрсетіп, жұмыс барысын таныстырды.

Бұл жобалар Сауран ауданында индустриалды аймақтарды дамытудың нақты тетігі болып табылады: жергілікті экономиканы әртараптандыру, кәсіпкерлік белсенділікті арттыру мен жаңа жұмыс орындарын ашу мақсатында қолға алынып отыр. Аудан және қала әкімдерінің бұл сапары өндірістік нысандарды аралап, тәжірибе алмасу арқылы өзара ынтымақтастықты нығайтып, басқа өңірлерде де осындай жобаларды жүзеге асыруға тың серпін берері анық.