Көгалдандыру жұмыстары қарқынды

Облыс әкімі Дархан Сатыбалды елді мекендерде егілген ағаштарды күтіп-баптау және көгалдандыру жұмыстырын күшейтуді тапсырған болатын. Осы орайда Отырар ауданының әкімі Сәкен Сұлтанханов Қарақоңыр, Отырар, Көксарай, Аққұм ауылдық округтерінде болып, абаттандыру, көгалдандыру жұмыстарының жай-күйімен танысты.

Ең алдымен аудан әкімі Көксарай ауылындағы көгалдандыру бойынша атқарылған жұмыстарды аралап көрді. Мұнда кәсіпкер Оразхан Жанысбековтың демеушілігімен орталық көшенің бойы қоршалып, 3 мыңға жуық көшет егілген. Мұнан соң аудан басшысы Аққұм ауылдық округіндегі көгалдандыру жұмыстарының жай-күйімен танысып, елді мекендегі жасыл аймаққа егілген көшеттерді күтіп-қарау жұмыстарын сапалы жүргізу керектігін ескертті. Көшеттер егілген жасыл аймақты келешекте халық демалатын саялы саябаққа айналдыру жұмыстарын ұйымдастыруды тапсырды. Жалпы, Аққұм ауылындағы жасыл алқапқа 2450 түп көшет егіліп, бүгінде олардың 80 пайыздан астамы өнген.

С.Сұлтанханов сондай-ақ, Шәмші Қалдаяқов ауылындағы көгалдандыру жұмыстарымен танысып, жаңадан салынатын спорт кешенінің құрылыс жобасын пысықтады.

Биыл осы елді мекендегі Ш.Ерманов, Азаттық, Әділет және Шәмші ауылына кіре беріс көшелерді жарықтандыру, Ш.Қалдаяқов ауылы мен Қарақоңыр стансасы аралығына аяқ жол салу, балалар ойын алаңшасын салу, Арыс елді мекеніндегі Ш.Әбілқасымов және У.Илясов көшелерін орта жөндеу, Сырдария елді мекенін газдандыру жұмыстары жүргізілмек. Елді мекендерді абаттандыру және көгалдандыру жұмыстары жалғасын табады деп күтілуде.

Аудан басшысы М.Шойманов ауылындағы саябақта көгалдандыру жұмыстары аясында егілген көшеттерді аралап көрді. Аталған жасыл аймақта 1000-нан аса көшет егілсе, бүгінде оның 60 пайызы ғана өнген. Аудан басшысы көшеттерді күтіп-баптау жұмыстарын сапалы ұйымдастыру керектігін айтып, ауыл округінің әкіміне тапсырмалар жүктеді.