ИНФРАҚҰРЫЛЫМ – АУДАН ДАМУЫНЫҢ НЕГІЗІ
Сауран ауданының әкімі Мақсат Асылбекұлы Таңғатаров жұмыс сапары аясында Жаңа Иқан ауылдық округіне қарасты Ибата елді мекенінде жүргізіліп жатқан электрмен қамтамасыз ету инфрақұрылымының құрылыс барысымен танысты. Бұл — тұрғындардың тұрмыс сапасын арттыруға бағытталған маңызды жобалардың бірі.
Аталған жобаның тапсырыс берушісі — Сауран ауданы әкімдігінің тұрғын үй-коммуналдық шаруашылығы және тұрғын үй инспекциясы бөлімі. Құрылыс-монтаж жұмыстарының мердігері ретінде «Ынтымақ Бес Арыс» ЖШС анықталған. Ал техникалық және авторлық қадағалауды тиісінше «Тұран құрылыс» ЖШС мен «ЖОББЕСТПРОЕКТ» ЖШС жүзеге асыруда.
Аудан әкімі құрылыс алаңын аралау барысында мердігер ұйым өкілдерінен нысанның техникалық сипаттамалары, атқарылған жұмыстардың көлемі мен сапасы, жұмысшылардың еңбек жағдайы туралы егжей-тегжейлі ақпарат алды. Сонымен қатар, жобаның мерзімінде және сапалы орындалуын, сондай-ақ еңбек қауіпсіздігі талаптарының сақталуын қатаң бақылауда ұстау қажеттігін ескертті.
«Электр энергиясы — елді мекендердің дамуындағы негізгі факторлардың бірі. Бұл жобаның іске асуы — Ибата тұрғындарының әлеуметтік әл-ауқатын арттыруға, шағын кәсіпкерлікті дамытуға, сондай-ақ жастарды ауылда тұрақты ұстап қалуға ықпал ететін маңызды қадам», — деді аудан басшысы.
Мақсат Таңғатаров өз сөзінде аудан көлеміндегі ауылдық округтерді сапалы инфрақұрылыммен қамту — әкімдік қызметінің басты басымдықтарының бірі екенін атап өтті. Бұл бағытта 2025 жылға дейін ауыз су, табиғи газ, электр энергиясы және жол жөндеу секілді инфрақұрылым салаларын дамытуға бағытталған бірнеше жобалар кезең-кезеңімен жүзеге асырылуда.
Ибата елді мекеніндегі жоба да осы кешенді бастамалардың нақты көрінісі. Құрылыс жұмыстары толығымен аяқталған соң, жергілікті тұрғындар тұрақты әрі сапалы электр энергиясымен қамтылып, күнделікті тұрмыстағы бірқатар қиындықтар шешімін табатын болады.
Аудан әкімінің жұмыс сапары барысында ауыл тұрғындары аталған нысанның маңыздылығын ерекше атап өтіп, инфрақұрылым саласындағы жүйелі жұмыстар үшін алғыстарын білдірді. Олар бұл жобаның іске асуы тұрмыстық жағдайды жақсартып қана қоймай, ауылға жаңа серпін беретінін жеткізді.
Қорытындылай келе, Сауран ауданында жүзеге асырылып жатқан бұл секілді инфрақұрылымдық жобалар өңірдің әлеуметтік-экономикалық дамуына тың серпін беріп, ауыл тұрғындарының өмір сапасын арттыруда маңызды рөл атқаруда.
