Сауран ауданының әкімі ауыл шаруашылығы саласының өкілдерімен кездесу өткізді
Сауран ауданының әкімі Мақсат Таңғатаров аудан аумағында ауыл шаруашылығы саласын дамыту, саладағы өзекті мәселелерді талқылау және алдағы кезеңге арналған міндеттерді айқындау мақсатында ауданның ауыл шаруашылығы саласының өкілдерімен кездесу өткізді. Кездесуге шаруа қожалықтарының жетекшілері, агроөнеркәсіп кешенінің мамандары, тиісті бөлім басшылары және ауылдық округ әкімдері қатысты.
Аудан әкімі өз сөзінде ауыл шаруашылығы – аудан экономикасының негізгі тіректерінің бірі екенін атап өтті. Ауыл халқының басым бөлігі осы салада еңбек етіп, өңірдің азық-түлік қауіпсіздігіне және әлеуметтік тұрақтылығына үлес қосып келеді.
«Ауыл шаруашылығы – елдің азық-түлік қауіпсіздігі мен экономикалық тұрақтылығының кепілі. Сондықтан бұл саланың дамуы – мемлекет пен жергілікті биліктің басты назарында», – деді әкім.
Мемлекеттік қолдаулар мен салалық бағдарламалар таныстырылды
Кездесу барысында аудан басшысы ауыл шаруашылығы саласына бағытталған мемлекеттік қолдау тетіктеріне, жеңілдетілген несиелер, субсидиялар, инфрақұрылымдық жобалар мен цифрландыру бастамаларына кеңінен тоқталды. Сонымен қатар, шаруалардың жаңаша жұмыс істеуіне мүмкіндік беретін ұлттық жобалардың тиімді тұстарын түсіндіріп, оларды белсенді пайдалануға шақырды.
Шаруалардың ұсыныс-пікірлері тыңдалды
Кездесу ашық пікір алмасу форматында өтті. Шаруа қожалықтарының иелері мен сала мамандары аудан бойынша көктемгі егіс жұмыстарының барысы, тұқым мен тыңайтқыш тапшылығы, су жеткіліксіздігі, техникамен қамтамасыз ету және баға тұрақсыздығы секілді бірқатар маңызды мәселелерді ортаға салды.
Аудан әкімі барлық көтерілген ұсыныс-өтініштерді мұқият тыңдап, нақты мәселелер бойынша жауапты бөлім басшыларына тиісті тапсырмалар берді. Сонымен қатар, кейбір мәселелердің шешімі облыстық және республикалық деңгейде қаралуы қажеттігін айтып, оларды жоғары тұрған органдарға жеткізуге уәде берді.
Байланыс пен сенім – табысты жұмыстың негізі
Кездесу қорытындысында Мақсат Таңғатаров шаруалармен тұрақты кері байланыс орнату, ашық диалогты дамыту және саладағы өзгерістер туралы дер кезінде ақпараттандырудың маңыздылығын атап өтті.
«Шаруалармен тығыз қарым-қатынас – барлық істің өзегінде тұруы тиіс. Біз мәселені бірге талдап, бірге шешуге дайынбыз. Бұл — ортақ жауапкершілік», – деді аудан басшысы.
Сондай-ақ, әкім салалық бөлімдерге ауыл шаруашылығы саласын дамытудың ұзақмерзімді жоспарын жасап, шаруаларға тұрақты әдістемелік, құқықтық және ұйымдастырушылық қолдау көрсету жөнінде тапсырма берді.
