ТҮРКІСТАН: ҰСТАЗДАР АЛЛЕЯСЫ ПАЙДА БОЛАДЫ

Түркістан облысы Кентау қаласы күннен күнге ажарланып келеді. Соңғы 2-3 жылда көп өзгеріс болды. Көктем шығысымен шағын шаһардың шырайы кіріп, көше бойларында көркі көз тартар бірнеше гүлзарлар орналастырылған. Орталық көше күрделі жөндеуден өтіп, ішкі орам жолдар да қалыпқа келтірілуде. Алдағы уақытта моно қала тағы бір нысанмен толықпақ.

Кентау қаласының әкімі Даурен Махажановтың тапсырмасымен қала орталығынан «Ұстаздар аллеясының» құрылысы бастау алды. Бұл аллеяға кентаулық ұстаздар қауымының құрметіне орай ерекше атау берілмек, деп хабарлайды oninfo.kz ақпарат агенттігі Түркістан облысы әкімдігінің баспасөз қызметіне сілтеме жасап.

Қаладағы Абай даңғылынан бой түзейтін аллеяда үлкен қыл қаламнан ескерткіш орнатылатын болады. Маңайында тұрғындардың тыныстап демалуына барлық жағдай жасалынып, арнайы замануи орындықтар мен жарық шамдар аллеяның ажарын одан әрі аша түспек. Сонымен қатар, аллеяда балаларға арналған соңғы үлгідегі ойын алаңшалар да қойылмақ.